Alfreð Finnbogason missti af nokkrum leikjum með íslenska landsliðinu vegna meiðsla en var kominn aftur í landsliðstreyjuna í vináttulandsleik gegn Frakklandi fyrr í kvöld.
Lestu um leikinn: Frakkland 2 - 2 Ísland
Alfreð var yfir sig ánægður með frammistöðu Íslands og svekktur að hafa ekki farið heim með sigur í farteskinu gegn heimsmeisturunum.
„Í fyrri hálfleik vorum við klárlega betra liðið og áttum fullt af færum til að skora fleiri mörk. Það er rosalega skrítið að segja en það er svekkjandi að hafa ekki farið með sigur af hólmi," sagði Alfreð í viðtali við Fótbolta.net að leikslokum.
„Mér fannst þetta vera svolítið 'statement' í kvöld þó að við höfum ekki sigrað leikinn."
Alfreð lagði upp fyrra mark Íslands í leiknum. Hann vann knöttinn ofarlega á vellinum eftir baráttu við Presnel Kimpembe sem lá eftir í jörðinni. Dómarinn flautaði ekki og lagði Alfreð knöttinn laglega á Birki Bjarnason sem skoraði.
„Mér fannst hann bara vera að bíða eftir aukaspyrnu, ég snerti boltann og fór aðeins í hann. Þetta var ekki brot samkvæmt mínum bókum þó það sé vitað mál að varnarmenn í þessari stöðu fá í 90% tilvika flautað brot."
Alfreð var að lokum spurður út í neikvæða umfjöllun um íslenska landsliðið í kjölfar tapleikja gegn Sviss og Belgíu í Þjóðadeildinni.
„Það eiga allir rétt á sinni skoðun og það er alveg eðlilegt að ekki sé talað vel um liðið þegar gengur illa. Ég held að við ættum að gefa þjálfurunum og nýja 'systeminu' smá tíma."
Athugasemdir