Sjáðu mörkin: Inter fagnaði tíunda bikarmeistaratitlinum

Inter hefur þegar tryggt sér ítalska deildartitilinn og liðið bætti öðrum titli í safnið í kvöld þegar það sigraði Lazio í úrslitum ítalska bikarsins.

Inter var með öll völd á vellinum í fyrri hálfleik en liðið komst yfir eftir um stundafjórðung þegar Adam Marusic varð fyrir því óláni að skalla boltann í eigið net.

Lautaro Martinez bætti öðru markinu við tíu mínútum fyrir lok fyrri hálfleiks. Denzel Dumfries vann boltann við vítateig Lazio og sendi á Martinez sem skoraði á opið markið.

Lazio sótti í sig veðrið í seinni hálfleik en mörkin urðu ekki fleiri og Inter fagnaði bikarmeistaratitlinum í tíunda sinn.