„Ég var tilbúinn. Þegar ég fór inn í Þrótt var stefnan að verða aðalþjálfari meistaraflokks í framtíðinni. Það kemur óvænt upp á þessum tímapunkti en ég er klár í áskorunina."

„Ég hef reynt að stýra mínum uppgangi í þjálfuninni og hef hægt og rólega verið að vinna mig upp yngri flokkana. Ég hef verið yfirþjálfari undanfarin ár og nú er komið að næsta skrefi."

Þrátt fyrir ungan aldur hefur Þórhallur verið lengi í þjálfun.

„Líf mitt hefur alltaf snúist um þetta. Fyrst byrjaði maður að spila fótbolta og ég var 12 ára þegar ég byrjaði að þjálfa. Svo fór maður að mennta sig í kringum það."

„Mér líður vel hjá Þrótti. Ég kom inn í júní í klúbbinn en það er nóg af verkefnum framundanum og þetta er spennandi."

Margt sem þarf að bæta
Hvernig er staðan á leikmannahópi Þróttar núna?

„Ég held að Gulli hafi farið ágætlega yfir það síðustu daga. Staðan gæti verið betri. Hópurinn er þunnur og margt sem þarf að bæta til að við verðum klárir í sumarið. Það er mikilvægt fyrir okkur að nýta dagana fram að sumri," segir Þórhallur.

Má ekki búast við jafnri Inkasso-deild?

„Jú ég gæti trúað því að það myndi þróast þangað. Maður veit ekki hvernig liðin styrkja sig fram að móti en það er ekkert lið sem öskrar á mann að muni stinga af."

Hvað vill Þórhallur gera með Þrótt?

„Ég er að skrifa undir samning til þriggja ára og vonandi munum við hægt og rólega ná að byggja upp lið sem er samkeppnishæft í að berjast um að komast upp. Veturinn hefur verið þungur en maður finnur fyrir samstöðu innan leikmannahópsins."

Það var markaflóð í leikjum Þróttar í fyrra og talað um rokk og ról fótbolta.

„Fyrsta skref er að ná smá skipulagi og aga í það. Við vorum að fá of mörg mörk á okkur síðasta sumar. Við höfum misst gríðarlegt magn af leikmönnum og við þurfum að finna leiðir. Það þarf að smíða stakk eftir vexti," segir Þórhallur en allt viðtalið er í sjónvarpinu hér að ofan.