Óvíst hvort Aron Einar verði með
Erik Hamren, nýr landsliðsþjálfari karla, tilkynnir sinn fyrsta landsliðshóp á fréttamannafundi á föstudaginn.
Hamren kynnir þar hópinn sem mætir Sviss í Þjóðadeildinni ytra þann 8. september og Belgíu á Laugardalsvelli þriðjudaginn 11. september.
Hamren hefur verið á landinu að undanförnu en hann var viðstaddur fréttamannafund í vikunni þar sem Freyr Alexandersson, landsliðsþjálfari kvenna, kynnti hópinn sem mætir Þýskalandi og Tékklandi í mikilvægum leikjum á næstunni.
Freyr er aðstoðarþjálfari Hamren og á föstudag kynna þeir sinn fyrsta hóp.
Mikil óvissa ríkir um það hvort landsliðsfyrirliðinn Aron Einar Gunnarsson verði með gegn Sviss og Belgíu en hann hefur ekki verið með Cardiff í fyrstu tveimur umferðunum í ensku úrvalsdeildinni vegna meiðsla.
Aron hefur einnig tilkynnt að hann ætli ekki að missa af því þegar annað barn hans kemur í heiminn en eiginkona hans Kristbjörg Jónasdóttir gengur með barn undir belti og það er væntanlegt í heiminn í byrjun september.
Athugasemdir