„Ég var mjög ánægður með stelpurnar í dag. Mér fannst við skilja allt eftir á vellinum. Þróttarliðið er hörkulið. Ég tel að við séum með einn besta framherjann líka en þær eru með tvær af bestu framherjum deildarinnar. Það sást í dag, þær höfðu gæði til að klára,“ sagði Jón Stefán Jónsson, annar þjálfari Tindastóls, eftir 4-2 tap gegn Þrótti í kvöld.
Lestu um leikinn: Þróttur R. 4 - 2 Tindastóll
Leikir Tindastóls hafa að undanförnu einkennst af markasúpu og það varð engin breyting á í kvöld. Bæði lið lögðu allt kapp á að spila góðan sóknarleik og úr varð hin besta skemmtun fyrir áhorfendur.
„Ég segi alltaf við mínar að við skorum alltaf en við þurfum að fara að skoða eitthvað hvað við fáum á okkur,“ sagði Jónsi en markatala liðsins er 7-10 eftir þrjár fyrstu umferðir.
Lið Tindastóls sýndi mikinn karakter í kvöld. Liðið barðist fyrir hverjum einasta bolta og svaraði tveimur fyrstu mörkum Þróttar um hæl.
„Það er rosalegur karakter í þessu liði. Við lentum líka 4-2 undir hérna og það hefði verið rosalega auðvelt að gefast upp og fá á sig fleiri, dauðþreyttar og með leikmann sem hefur ekki spilað fótbolta í tvö ár inná vellinum. En við héldum áfram og fengum 2-3 færi í viðbót. Ég hef rosalega lítið út á þetta að setja,“ sagði Jónsi.
Tindastólsliðið er nýtt í deildinni eftir að unnið sig upp úr 2. deild í fyrra og Jónsi segir leikmenn og þjálfara fagna því að spila aftur í Inkasso.
„Það er æðislegt. Við njótum hverrar sekúndu. Við erum sennilega ekki búin að fá auðveldustu byrjunina sem liðin fá. Fáum Hauka í fyrsta leik, svo FH og Þrótt. Sennilega þrjú af bestu fjórum liðum í deildinni.“
Nánar er rætt við þjálfara Tindastóls í spilaranum hér að ofan.
Athugasemdir