„Stórt hrós til stelpnanna fyrir allan leikinn. Það var einbeitingarskortur í mörkunum en okkar tilfinning er sú að 4-0 segir ekki allt um gang leiksins. Stelpurnar lögðu gríðarlega mikið á sig og við æfðum vel. Við vissum mikið um Þróttarliðið en gæðin hjá þeim eru bara svo mikið að það var erfitt að stoppa þær í 90 mínútur,“ sagði Aron Ýmir Pétursson, annar þjálfari ÍA, eftir 4-0 tap gegn toppliði Þróttar í Inkasso-deildinni í kvöld.
Lestu um leikinn: ÍA 0 - 4 Þróttur R.
Skagaliðið gerði virkilega vel í fyrri hálfleik en fékk á sig mark rétt fyrir leikhlé. Það hafði áhrif á hvernig síðari hálfleikur þróaðist.
„Auðvitað viljum við sækja þegar við lendum undir og við ætluðum að fá eitthvað út úr þessum leik en það opnast auðvitað eitthvað þegar við reynum að stíga framar á móti þessum gæðum og við lentum í brasi fyrstu 20 í seinni hálfleik. En eftir 3-0 markið þá fannst mér við recovera þokkalega og stórt hrós til stelpanna fyrir það.“
Botnpakki Inkasso-deildarinnar er afar þéttur og lið ÍA situr í 6. sæti með 16 stig, þremur stigum frá fallsæti. Aðspurður um það hvernig ÍA ætlaði að tryggja áframhaldandi veru í deildinni svaraði Aron Ýmir einfaldlega:
„Með því að vinna Augnablik. Það er næsta verkefni og við ætlum að fara í Kópavoginn og vinna þær. Sjá svo hverju það skilar okkur.“
„Við eigum þrjá leiki eftir. Eigum svo Aftureldingu og Tindastól og miðað við vinnuframlagið og hvernig þetta spilaðist í dag þá finnst mér við eiga að taka einhver stig úr öllum þessum leikjum.“
Hægt er að horfa á allt viðtalið við Aron Ými í spilaranum hér að ofan.
Athugasemdir