Í dag er ferðinni heitið á Seyðisfjörð þar sem stemningin er skoðuð hjá Huginn.

Friðjón Gunnlaugsson fyrirliði liðsins svaraði nokkrum spurningum.

Hvernig er stemningin hjá Huginn þessa dagana?
Stemmningin hjá Huginn og á Seyðisfirði er alltaf góð. Þrátt fyrir brösótt gengi í vetur í æfingaleikjum og deildarbikarnum, þá komu mjög góð úrslit í fyrsta leiknum hjá okkur í deildinni og það eru þau úrslit sem skipta máli. Þannig að við Huginsmenn erum brattir og lítum björtum augum á sumarið.

Er mikill fótboltaáhugi á Seyðisfirði?
Já, það er vægast sagt mjög mikill fótboltaáhugi á Seyðisfirði og ekkert nema gott um það að segja. Stór hluti bæjarbúa mætir á alla heimaleikina hjá okkur og það er nánast alltaf einhverjir Seyðfirðingar sem eru að mæta á útileikina líka. Eftir leiki tala bæjarbúar nánast ekkert um annað en síðasta leik og byrja að telja niður í þann næsta.

Er mikil spenna fyrir fyrsta heimaleiknum gegn Völsungi í kvöld
Já, það er mikil spenna í loftinu og það verður væntanlega allt fullt á vellinum. Allir helstu samskiptamiðlar landsins/veraldarvefsins eru notaðir til að auglýsa leikinn og ég reikna með mikilli stemmningu á leiknum.

Er liðið mikið breytt frá því í fyrra?
Liðið er aðeins breytt frá því í fyrra. Við höfum misst Jón Kolbein úr markinu, þar sem hann er í námi úti í Danmörku og fær lítið sumarfrí, einnig hafa horfið á braut Englendingarnir David Venn úr vörninni og Benjamin Þór Waldmann úr miðjunni, það er mikill missir af þeim enda hörku góðir fótboltamenn. Svo fór Makedóníumaðurinn sem kom frá Fjarðabyggð á miðju sumri í fyrra, hann Alexander Konjanovski til Svíþjóðar og er að spila þar núna.

En á móti, þá höfum við fengið góðan liðstyrk. Húsvíkingurinn Björn Halldórsson hefur dregið hanskana af hillunni og ætlar að standa á milli stanganna hjá okkur í sumar, einnig er von á írskum pilti að nafni Jacob Travis núna um mánaðarmótin auk þess sem Marjan Ratkovic, sem spilaði með okkur í fyrra, er rétt ókominn. Tveir Djúpavogspiltar, Njáll Reynisson og Skúli Andrésson hafa skipt yfir til okkar og reikna ég með að þeir eigi eftir að gera góða hluti. Að ógleymdum, þá er Jeppe Opstrup aftur kominn heim og á eftir að raða inn mörkum í sumar ef allt er eðlilegt, en það eru enn ca. 2 vikur í að hann verði kominn á fullt, því hann er að jafna sig af meiðslum.

Í stuttu máli sagt þá tel ég liðið a.m.k. ekki veikara en það var í fyrra, verður bara sterkara ef eitthvað er, því það eru líka ungir piltar í liðinu sem eru árinu eldri en í fyrra og þeir verða hörkugóðir ef þeir verða duglegir að æfa.

Ykkur er spáð 4.sæti í D-riðlinum. Telur þú að það sé raunhæf spá?
Miðað við hvernig undirbúningstímabilið spilaðist, þá tel ég þetta raunhæfa spá. En við ætlum okkur stærri hluti og við stefnum á 1.sæti riðilsins, enda förum við í alla leiki til að fá 3 stig.

Hver er helsti styrkleiki ykkar?
Jafn og góður hópur, þar sem enginn sker sig langt úr, er styrkleikinn okkar. Samheldni og stuðningur og áhugi bæjarbúa er einnig mjög mikill styrkur fyrir okkur - enda erum við að spila fyrir bæinn okkar og bæjarbúa, og það er eitthvað sem gefur okkur alltaf aukastyrk. Sóknarleikurinn okkar hefur líka oftast verið sterkur, enda viljum við sækja og skora mörk, á móti þá hefur varnarleikurinn mátt líða fyrir það, sérstaklega á undirbúningstímabilinu. En náum við að fylla vel upp í götin í varnaleiknum þá gætum við gert góða hluti í sumar.

Hver eru markmið ykkar fyrir sumarið?
Við förum í hvern einasta leik til að vinna og þar af leiðir ætlum við okkur að fara upp um deild. Það er markmiðið nr. 1, 2 og 3.

Hvaða lið telur þú að sé sigurstranglegast í 3.deildinni í sumar? Völsungur er með mjög gott lið og ég tel þá vera mjög sigurstranglega í sumar. Dalvík/Reynir er sömuleiðis með sterkt lið og þeir ættu að geta blandað sér í baráttuna. En ég verð að viðurkenna það að ég þekki bara hreinlega ekki nógu vel hin liðin í deildinni og get því ekki metið styrkleikann þeirra.

Eitthvað að lokum?
Vil þakka fotbolta.net fyrir skemmtilega og góða umfjöllun um 3.deildina. Þetta er líklega eini staðurinn sem maður getur lesið eitthvað um þá deild og því ber að hrósa ykkur. Einnig þá vonast ég eftir skemmtilegu fótboltasumri og hvet alla Seyðfirðinga til að mæta á völlinn og hvetja okkur áfram.

Eldra úr liðnum "Hvað er að frétta?"

1.deild:
ÍR (29.maí)
KA (15.maí)
Leiknir R. (29.maí)
Víkingur Ólafsvík (26.mars)
Þór (15.maí)

2.deild:
BÍ/Bolungarvík (29.apríl)
Hamar (21.apríl)
ÍH/HV (17.apríl)
Reynir Sandgerði (3.apríl)

3.deild:
Árborg (14.maí)
Berserkir (1.maí)
Draupnir (25.mars)
Einherji (16.apríl)
KFK (20.maí)
KFR (31.mars)
KFS (30.apríl)
Léttir (8.maí)