Í dag er kíkt á stemninguna hjá Knattspyrnufélagi Breiðholts (KB) í þriðju deildinni. Þórður Einarsson spilandi þjálfari KB svaraði nokkrum spurningum?

Hvernig er stemningin hjá KB þessa dagana?
Við erum virkilega ánægðir með mætinguna á leiki hjá okkur, sérstaklega frá henni Rögnu úr Fylki en hún og miðjumaður okkar Sævar Ólafsson, eru heitasta fótboltapar bæjarins. Þegar ástin er annarsvegar er stemningin góð. Við erum ánægðir með okkar hóp sem hefur aldrei verið skipaður jafn miklum herramönnum... bara ef við gætum aðeins meira í fótbolta.

Ertu sáttur við byrjun ykkar í sumar?
Nei. Byrjunin eru ákveðin vonbrigði en lífið heldur áfram og vonandi verður stígandi í okkar leik. Við værum til í að vera með aðeins fleiri stig.

Er liðið mikið breytt frá því í fyrra?
Já ansi mikið. Meðalaldur liðsins hefur aldrei verið eins hár enda hafa gamlir Leiknismenn verið að taka skóna úr hillunni. Þar á meðal Haukur Gunnarsson sem styrkir vörn okkar mikið og er tekinn við fyrirliðabandinu. Við höfum misst nokkra lykilmenn frá í fyrra, þar á meðal Ólaf Hrannar Kristjánsson sem er kominn upp í Leikni. Hann skoraði í hverjum leik fyrir okkur svo brotthvarf hans breytir ýmsu. En mikilvægast er að ég er enn á miðjunni gegnum súrt og sætt, aðallega súrt. Samherji minn á miðjunni má samt fara að hysja upp um sig brækurnar.

Er liðið í miklu samstarfi við Leikni?
Já samstarfið er nokk mikið. Erum með sameiginlegan 2. og 3. flokk og getum því notað leikmenn úr þeim flokkum í okkar liði og gefið þeim reynslu í karlmannsbolta. Svo spilum við auðvitað með Leiknismerkið á brjósti og leikum heimaleiki okkar á Leiknisvelli. Þetta er þriðja árið sem KB starfar og er mikil ánægja með samstarfið.

Bikarævintýri ykkar vakti mikla athygli í fyrra. Eru ekki vonbrigði að hafa ekki náð í 32-liða úrslitin í ár?
Nei.

Hver er helsti styrkleiki ykkar?
Erum með gríðarlega lipran asískan kantmann. Þá höfum við fína reynslu og svo er ágætis hraði í liðinu. Svo má ekki gleyma því að þjálfarinn er taktískur snillingur.

Hver eru markmið ykkar fyrir sumarið?
Við tökum einn leik fyrir í einu því við megum ekki gleyma að enginn spilar betur en andstæðingurinn leyfir. Það eru ellefu leikmenn á vellinum og það lið sem skorar fleiri mörk vinnur leikinn. Við þurfum að leggja okkur 110% fram í alla leiki og förum í hvern leik til að vinna hann. Við stefnum áfram að því að vera fallegastir á velli eins og undanfarin ár enda leikum við í fallegustu búningum landsins. Þá setjum við það markmið að vera ekki klisjukenndir í viðtölum. Annars spyrjum við að leikslokum.

Hvaða lið telur þú að sé sigurstranglegast í 3.deildinni í sumar?
Keilufélagið Keila, KFK, byrjar tímabilið af krafti. Ég hef alla trú á því að Maggi Bö nái að rífa sína menn upp um deild enda hefur hann yfirgripsmikla kunnáttu í knattspyrnufræðunum og á heima í deild þeirra bestu.

Eitthvað að lokum?
Ég ætla að gera orð Knúts Barðdals að mínum og henda í ykkur stöku sem hann samdi um aldamótin síðustu.

Ungar stúlkur viljum fá
alla heimaleiki á
Þær mega setjast hliðiná
unnustukonu Sævars þá

Vonumst eftir góðum stuðningi og þökkum Fótbolta.net fyrir umfjöllun um neðri deildirnar. Með von um að önnur 3. deildarlið taki okkur til fyrirmyndar og nálgist þetta af álíka fagmennsku og við.

Eldra úr liðnum "Hvað er að frétta?"

1.deild:
Fjarðabyggð (10.júní)
ÍR (29.maí)
KA (15.maí)
Leiknir R. (29.maí)
Víkingur Ólafsvík (26.mars)
Þór (15.maí)

2.deild:
BÍ/Bolungarvík (29.apríl)
Hamar (21.apríl)
ÍH/HV (17.apríl)
Reynir Sandgerði (3.apríl)
Víðir Garði (21.maí)

3.deild:
Árborg (14.maí)
Berserkir (1.maí)
Draupnir (25.mars)
Einherji (16.apríl)
Huginn (29.maí)
KFG (10.júní)
KFK (20.maí)
KFR (31.mars)
KFS (30.apríl)
Léttir (8.maí)
Skallagrímur (11.júní)