Blackburn Rovers er í hættu á að falla niður um deild eftir að liðið tapaði fyrir Sheffield Wednesday, 3-1, í ensku B-deildinni á Ewood Park í dag.

Josh Windass kom Wednesday á bragðið á 6. mínútu en Sammie Szmodics, sem hefur verið einn besti leikmaður deildarinnar, jafnaði þremur mínútum síðar með 25. marki sínu á tímabilinu.

Marvin Johnson kom Wednesday aftur í forystu á 58. mínútu og sex mínútum síðar gerði Aynsley Pears, markvörður Blackburn, afdrifarík mistök og kom boltanum í eigið net.

Varnarmaður Blackburn sendi boltann niður á Pears, sem hitti hann illa. Mikill snúningur kom á boltann, sem skoppaði síðan aftur fyrir Pears og í netið.

Mistök sem gætu kostað Blackburn þegar talið verður upp úr pokanum í næsta mánuði en liðið er nú í 19. sæti með 49 stig, aðeins þremur stigum frá fallsæti þegar tvær umferðir eru eftir. Sigurinn var gríðarlega mikilvægur fyrir Wednesday sem komst upp úr fallsæti og í 21. sæti.