Wayne Rooney, sem lék sinn síðasta landsleik fyrir Englands hönd síðastliðinn fimmtudag, viðurkennir áhuga á því að fara út í þjálfun þegar leikmannaferlinum lýkur.
Rooney er 33 ára gamall og spilar í dag með DC United í Bandaríkjunum þar sem hann mun enda ferilinn.
Þessi fyrrum leikmaður Manchester United og Everton er að vinna í því að afla sér þjálfararéttinda og stefnir á að gerast þjálfari þegar ferlinum lýkur.
„Það er eitthvað sem ég er spenntur fyrir og hef áhuga á því að gera," sagði Rooney við vefsíðu Manchester United.
„Ég þarf að klára að ná mér í þjálfararéttinda, ég er að gera það í Bandaríkjunum. Vonandi þegar ég kem aftur til Englands, þá verð ég búinn að ná í þau og í stöðu til að samþykkja og neita tilboðum sem ég fæ í hendurnar."
Ef Rooney fer út í þjálfun þá mun hann fylgja í fótspor fyrrum félaga sinna í enska landsliðinu, Steven Gerrard og Frank Lampard, sem eru báðir orðnir knattspyrnustjórar. Gerrard stýrir Rangers í Skotlandi og Lampard er hjá Derby í Championship-deildinni.
Ryan Giggs, fyrrum liðsfélagi Rooney hjá Man Utd, er þá orðinn landsliðsþjálfari Wales.
Athugasemdir