Arnþór hafði lofað liðsfélögum sínum því að raka hárið af sér af ef KR yrði Íslandsmeistari. Á endanum fékk hann að lita hárið í staðinn.

„Mér skilst að hann hafi lofað því að raka sig sköllóttan ef við yrðum Íslandsmeistarar. Hann ætlaði að vera eins og Kiddi Jóns. Kiddi segir reyndar sjálfur að það sé val hjá honum að vera svona, hann sé ekki sköllóttur," sagði Rúnar Kristinsson, þjálfari KR, við Fótbolta.net í dag.

„Ég held að Arnþór hafi ekki fengið leyfi heima fyrir og þeir aflituðu hann einhverjir í hópnum. Mér finnst hann vera mjög flottur. Þetta kemur mjög vel út."

Arnþór Ingi kom til KR frá Víkingi R. síðastliðinn vetur og hefur átt mjög gott tímabil í Vesturbænum.

Rúnar ræddi meira um Arnþór Inga í Miðjunni í dag. Hér að neðan má hlusta á þáttinn.