„Þessir strákar sem ég er með hérna eru algjörlega geggjaðir, það er bara eitt orð yfir þá, geggjaðir drengir," sagði Yngvi í viðtali að leikslokum.

Skallagrímur vann fyrri leikinn 3-2 heima og lenti 2-0 undir á Álftanesi. Gestirnir náðu að jafna og var staðan 2-2 þar til á lokamínútunni þegar heimamenn skoruðu og sendu leikinn í framlengingu.

Skallagrímur skoraði snemma í framlengingunni og missti svo mann af velli. Álftanes náði að koma knettinum í netið á lokamínútunum en það nægði ekki því Skallagrímur fór áfram á útivallarmörkum.

„Ég hef verið í þessu lengi, í mörg, mörg ár, en það er langt síðan maður hefur upplifað svona mikla spennu og dramatík. Þetta er búið að vera geggjað.

„Við lentum 4-0 undir á móti Ými síðast og 1-0 í síðasta leik á móti Álftanesi, við erum öllu vanir í þessu. Það er svo mikill karakter í þessum strákum, þeir eru algjörlega stórkostlegir."

Yngvi sýndi mikinn eldmóð á hliðarlínunni og var sendur upp í stúku í framlengingunni. Hann missti því af stemningunni á bekknum undir lokin.

„Maðurinn sem dæmdi leikinn var búinn að henda mér upp í stúku svo ég sá þetta ekkert. Þetta var alveg ótrúlegt, ég hef sjaldan lent í öðru eins."

Að lokum var Yngvi spurður út í framtíð sína hjá Skallagrími og sagðist ekkert vita í þeim efnum.