Sverrir Ingi Ingason.
Sverrir Ingi Ingason er mættur aftur í íslenska landsliðshópinn eftir að hafa dregið sig úr hópnum gegn Albaníu og Moldóvu í síðasta mánuði. Sverrir ákvað að draga sig út úr hópnum þá til að æfa með PAOK og reyna að ná byrjunarliðssæti hjá gríska félaginu. Það skilaði þó ekki árangri.
„Ég reyndi að gera allt sem ég gat til að festa eitthvað inn í haus þjálfara klúbbsins en það hefur ekki skilað sér ennþá. Það er svekkjandi en það er eins og það er. Ég þarf að takast á við það," sagði Sverrir við Fótbolta.net.
Sverrir kom til PAOK frá Rostov í Rússlandi í janúar en hann hefur ekki náð að festa sig í sessi í byrjunarliðinu þar ennþá.
„Ég átti gott samtal við landsliðsþjálfarana og þeir voru sammála mér að reyna að gera allt. Ef ég er að spila í félagsliði þá getur það hjálpað landsliðinu ennþá meira og það er það sem ég vil gera," sagði Sverrir.
Sverrir fær líklega langþráð tækifæri í byrjunarliði PAOK eftir landsleikjahléið þar sem varnarmaðurinn Fernando Varela verður frá næstu 4-6 vikurnar.
„Vonandi opnast einhver gluggi til að fá einhver tækifæri. Vonandi fæ ég þau og get brotist af alvöru inn í liðið. Það væri ánægjulegt," sagði Sverrir.
Hér að ofan má sjá viðtalið í heild sinni.
