Joao Cancelo, nýr leikmaður Bayern München, var ekki lengi að láta að sér kveða með liðinu en aðeins sólarhring eftir að hann gekk í raðir félagsins lagði hann upp í 4-0 sigri á Mainz í 16-liða úrslitum þýska bikarsins.

Portúgalski varnarmaðurinn var settur beint í byrjunarliðið og lagði upp fyrir Eric Choupo-Moting á 17. mínútu.

Jamal Musiala gerði annað markið á 30. mínútu áður en Leroy Sane kom með þriðja undir lok fyrri hálfleiks.

Kanadíski landsliðsmaðurinn Alphonso Davies rak síðasta naglann í kistu Mainz á 83. mínútu en stuttu áður var Bo Svensson, þjálfari Mainz, rekinn upp í stúku.

Mainz fékk annað rautt spjald stuttu síðar er Alexander Hack fékk annað gula spjald sitt í leiknum. Lokatölur 4-0 og Bayern komið í 8-liða úrslit.