Það voru fjórir leikir í Pepsi Max-deild karla að klárast. Það voru gríðarlega óvænt úrslit í Kórnum þar sem HK lagði topplið KR.

Krísufundur hjá KR eftir 20 mínútur í Kórnum. HK leiðir 3-0! #fotboltinet pic.twitter.com/5XhRogefTB

— Magnús Már Einarsson (@maggimar) August 11, 2019

Pálmi Rafn Pálmason minnkaði muninn fyrir KR rétt fyrir leikhlé með þrumuskoti. Þetta var líflína fyrir KR, en þeir náðu ekki að fylgja því eftir í seinni hálfleik. HK varðist vel og skoraði eitt mark til viðbótar undir lokin. Það gerði Emil Atlason, lokatölur 4-1.

Nýliðar HK hafa verið að spila mjög vel að undanförnu og eru þeir komnir upp í þriðja sæti deildarinnar! Það er Evrópusæti. Brynjar Björn Gunnarsson og leikmenn hans að gera magnaða hluti. KR er á toppnum með 36 stig, eru enn í góðum málum.

Rosalegur leikur á Akureyri
Fyrir norðan mættust KA og Stjarnan. KA var í fallsæti fyrir leikinn og þeir ætluðu sér að koma sér úr því. Það var rigning og vindur á Akureyri og völlurinn sleipur.

Hallgrímur Mar Steingrímsson kom KA yfir á sjöttu mínútu þegar hann fylgdi á eftir vítaspyrnu sinni sem Haraldur Björnsson varði.

Hallgrímur Mar kom KA í 2-0 á 14. mínútu, en Þorsteinn Már Ragnarsson minnkaði muninn stuttu síðar. „Fyrstu 20 mínúturnar í þessum leik voru manískar, en þetta hefur aðeins róast núna. Stjarnan er mun meira með boltann á meðan KA liðið liggur neðar og reyna að sækja hratt. Þeir virka ógnandi í skyndisóknum og Stjörnumenn eru varir um sig," skrifaði Daníel Smári Magnússon í beinni textalýsingu. Leikurinn var ekki rólegur lengi.

Á 44. mínútu fékk Daníel Laxdal, leikmaður Stjörnunnar, að líta rauða spjaldið, sitt seinna gula spjald. Áhorfendur fengu allt fyrir peninginn.

Seinni hálfleikurinn var ekki síðri. Torfi Tímoteus Gunnarsson kom KA í 3-1 í upphafi seinni hálfleiks eftir sendingu Hallgríms Mar. Þorsteinn Már minnkaði muninn fyrir 10 leikmenn Stjörnunnar á 64. mínútu og Stjarnan var í séns.

Sá séns lifði ekki rosalega lengi því Elfar Árni Aðalsteinsson skoraði fjórða mark KA fjórum mínútum eftir mark Þorsteins. Það var síðasta markið í þessum rosalega leik og lokatölur 4-2.

KA fer upp í tíunda sæti með 19 stig. Stjarnan er í fjórða sæti með 24 stig.

Víkingur og Breiðablik með sigra
Óttar Magnús Karlsson skoraði tvisvar þegar Víkingur R. vann ÍBV, 3-1. Óttar Magnús fer vel af stað í deildinni, hann er kominn með þrjú mörk í tveimur leikjum.

Víkingur er eftir þennan sigur með 19 stig í áttunda sæti. Fylkir og KA eru einnig með 19 stig og fallbaráttan hörð. Grindavík er sem stendur í fallsæti með 17 stig, en Grindavík mætir Fylki á morgun. ÍBV minnir á Keflavík frá því í fyrra og er í fallsæti með fimm stig. Það fer að styttast í að það verði hægt að staðfesta fall ÍBV.

Breiðablik náði þá að minnka forystu KR á toppnum með 2-1 sigri gegn ÍA á Akranesi. Öll mörk leiksins komu á fyrstu 10 mínútunum.

Breiðablik er í öðru sæti með 29 stig. ÍA hefur aðeins unnið einn af síðustu 11 leikjum sínum í öllum keppnum, en er samt í sjötta sæti deildarinnar með 22 stig.

Þrjú stig fara með Akraborginni í Kópavoginn. #Blix

— Arnar Sveinn (@arnarsveinn) August 11, 2019

3-1 sigur Víkings staðreynd. @ottar7 og @WizboyKwame með mörk okkar manna!
🔴⚫️🔴⚫️

— Víkingur FC (@vikingurfc) August 11, 2019