Cagliari mætir Fiorentina í fyrsta leik dagsins og að honum loknum hefjast hinir átta leikirnir á sama tíma.

Þar er að finna nokkra áhugaverða slagi, meðal annars viðureign Atalanta gegn Benevento, Sassuolo gegn Juventus og Inter gegn Roma.

Juve er óvænt þremur stigum frá Meistaradeildarsæti þegar þrjár umferðir eru eftir. Ítalíumeistararnir margföldu þurfa sigur í kvöld á erfiðum útivelli gegn Sassuolo sem er á mikilli siglingu og aðeins tveimur stigum frá Roma í Evrópudeildarsæti.

Evrópubaráttan er afar hörð á Ítalíu þó Inter sé búið að tryggja sér deildartitilinn. Það eru fjögur lið að berjast um þrjú Meistaradeildarsæti á meðan tvö lið eru að berjast um eitt Evrópudeildarsæti.

Þá er einnig líf í fallbaráttunni þar sem Benevento getur enn bjargað sér frá falli. Lærisveinar Filippo Inzaghi eiga þó virkilega erfiðan leik í kvöld þegar þeir heimsækja skemmtilegt sóknarlið Atalanta til Bergamó.

Spezia getur þá nánast bjargað sér frá falli úr efstu deild með sigri gegn nágrönnum sínum í Sampdoria í kvöld.

Leikir kvöldsins:
16:30 Cagliari - Fiorentina (Stöð 2 Sport 2)
18:45 Atalanta - Benevento
18:45 Bologna - Genoa
18:45 Sassuolo - Juventus
18:45 Torino - Milan
18:45 Lazio - Parma
18:45 Inter - Roma (Stöð 2 Sport 2)
18:45 Sampdoria - Spezia