Jurgen Klopp, stjóri Liverpool, og aðrir hjá félaginu eru áhyggjufullir yfir ökklameiðslum sem miðjumaðurinn Fabinho varð fyrir í leiknum gegn Napoli í gærkvöldi.
„Það stærsta í þessu öllu eru meiðsli Fabinho, það er risastórt. Það er of snemmt til að segja en við vonum að þetta sé ekki of alvarlegt. Þetta er sársauki í kringum ökklann sem er aldrei gott," sagði Klopp eftir leikinn í gær.
Deco, fyrrum leikmaður Chelsea og Barcelona, er í umboðsmannateymi Fabinho og átti þátt í félagaskiptum hans til Liverpool á sínum tíma.
Deco var á Anfield í gær og eftir leik birti hann mynd af sér ásamt Fabinho en þar sést leikmaðurinn með spelku utan um fótinn.
Það ætti að koma betur í ljós á næstu dögum hversu lengi Fabinho verður frá en gríðarlega þétt leikjaprógram er framundan hjá Liverpool og það yrði mikið áfall fyrir liðið ef þessi lykilmaður verður lengi frá keppni.
Athugasemdir