KR er annað liðið til að tryggja sér sæti í undanúrslitum A-deildar Lengjubikarsins eftir 3-0 sigur á Fylki á Valsvelli í kvöld.

Fylkismenn voru betri í fyrri hálfleiknum en Stefán Logi Magnússon átti stórleik í marki KR og sá til þess að staðan í leikhléi var markalaus.

Í síðari hálfleiknum tóku KR-ingar öll völd og danski framherjinn Morten Beck Andersen kom KR-ingum yfir á 50.mínútu. Óskar Örn Hauksson tvöfaldaði forystuna skömmu síðar með fallegu marki.

Morten Beck Andersen var svo aftur á ferðinni á 66.mínútu og gulltryggði KR-ingum sæti í undanúrslitum en Fylkismenn eru úr leik í Lengjubikarnum í ár.