Fyrr í dag tilkynnti Sassuolo að liðið ætli að hefja æfingar á mánudag. Það er fyrsta félagið í Seríu A sem tilkynnir um að æfing muni fara fram eftir að deildinni var slegið á frest í mars.

Emilia-Romagna héraðið tilkynnti fyrr í þessari viku að hægt væri að hefja æfingar á svæðinu en áfram yrði að virða reglur um fjarlægð.

„Sassuolo tilkynnir hér með að 4. maí fái leikmenn ákveðinn aðgang að æfingasvæði félagsins og geti þar farið á einstaklingsæfingu."

„Leikmenn fá einungis aðgang að völlunum á svæðinu en áfram verður lokað innanhús. Einstaklingsæfingar fara fram um morguninn frá mánudegi til föstudag. Þrír vellir verða opnir og sex leikmenn mega æfa á hverri klukkustund. Hver leikmaður fær hálfan völl fyrir sig."

Napoli gæti orðið annað liðið til að tilkynna að einstaklingsæfingar geti hafist en félagið hefur ekki tilkynnt um slíkt til þessa.