Thiago og Matip yfirgefa Liverpool (Staðfest)

Leikmennirnir tveir hafa spilað lítið á þessu tímabili vegna meiðsla. Matip, sem er fyrrum landsliðsmaður Kamerún, hefur ekki spilað síðan hann sleit krossbönd í leik gegn Fulham í desember.

Thiago, sem er fyrrum leikmaður Barcelona, missti af fyrstu sex mánuðum tímabilsins vegna vandamála í mjöðm. Hann snéri aftur í leik gegn Arsenal í febrúar en varð fyrir vöðvameiðslum sem hafa haldið honum frá síðan.

Ekki hægt að segja neitt slæmt
„Þetta hafa verið átta dásamleg ár hérna í Liverpool. Mér var leyft að vera hluti af spennandi árum hjá félaginu. Við höfum unnið mögnuð afrek og erum með bestu stuðningsmenn í heimi," segir Matip.

Jurgen Klopp stjóri Liverpool, sem yfirgefur einnig félagið eftir tímabilið, fer fögrum orðum um Matip.

„Á öllum mínum árum í boltanum held ég að ég hafi ekki kynnst mörgum leikmönnum sem eru elskaðri en Joel Matip. Ég er ekki viss um það sé hægt að segja eitthvað slæmt um hann," segir Klopp.

Thiago og Matip unnu FA-bikarinn og deildabikarinn með Liverpool 2022. Á því tímabili endaði Liverpool einu stigi á eftir meisturum Manchester City í úrvalsdeildinni og tapaði gegn Real Madrid í úrslitaleik Meistaradeildarinnar.

„Ef þú elskar fótbolta þá var rökrétt að þú horfðir á Thiago Alcantara spila. Meðsli hafa sett leiðinlegt strik í reikninginn en þegar hann var heill þá var hann ótrúlegur fyrir okkur. Ég mun alltaf muna eftir því," segir Klopp.

YNWA @LFC pic.twitter.com/M9CVe9az9E

— Thiago Alcantara (@Thiago6) May 17, 2024