ReyCup Senior snýst ekki um að vera í toppformi - það snýst um að mæta, hreyfa sig og hafa gaman
Dagana 19.–20. júní fyllist Laugardalurinn af fótbolta, gleði og góðum félagsskap þegar ReyCup Senior mótið fer fram.
Mótið er alþjóðlegt fótboltamót fyrir karla og konur sem vilja hreyfa sig, hitta skemmtilegt fólk og njóta samverunnar í íslensku miðnætursólinni.
Mótið er alþjóðlegt fótboltamót fyrir karla og konur sem vilja hreyfa sig, hitta skemmtilegt fólk og njóta samverunnar í íslensku miðnætursólinni.
Þetta er fótbolti fyrir alla, óháð aldri og getu, þar sem keppt verður í 7 manna bolta, göngubolta og fótboltahreysti. Mótið er kjörið tækifæri til að kalla saman gamla spilafélaga, skólafélaga eða vinnufélaga, hóa liðinu saman á ný og rifja upp gamla takta. Hreyfing og samvera fara saman, og fátt er hollara fyrir bæði líkama og sál en að spila bolta með góðum vinum.
„ReyCup Senior snýst ekki um að vera í toppformi - það snýst um að mæta, hreyfa sig og hafa gaman. FC Sækó og Africa United verða meðal þátttakenda ásamt Eintracht Frankfurt, FC Tirana og Panama Legends – sem eiga fyrir höndum talsvert ferðalag. Ég hvet alla karla, hvort sem þeir hafa spilað í mörg ár eða vilja bara rifja upp gamla takta, til að safna saman liði og skella sér með," segir Indriði Waage, sem mun stýra liði í 50+ deildinni.
„Það er svo mikill kraftur og gleði í því þegar konur koma saman á vellinum. Hér mætast öll getustig og aldur, og stemningin er einstök. Drottningarnar eru skráðar til leiks og stór hópur kvenna á leið til landsins frá Bandaríkjunum og Kanada, m.a. Soccer Sisters og Monsson. Ég hvet konur til að grípa tækifærið, kalla saman vinkonur eða gamla liðsfélaga og vera með," segir Hertha Rós Sigursveinsdóttir, sem stýrir Dömudeild Þróttar.
Hvort sem þú vilt keppa, ganga eða einfaldlega njóta dagsins með félögunum, þá er pláss fyrir þig á ReyCup Senior. Safnaðu liði, skráðu þig og taktu þátt í einstakri fótboltahátíð í hjarta Reykjavíkur. Nánari upplýsingar og skráningu má finna á ReyCup.is.
