Að þessu sinni kíkjum við á Fáskrúðsfjörð og könnum stemninguna hjá Leiknismönnum en Vilberg Marinó Jónasson spilandi þjálfari liðsins svaraði nokkrum spurningum.

Hvernig er stemningin hjá Leikni F. þessa dagana?
Stemmingin er nokkuð góð, Það hefur alltaf verið létt yfir mönnum hér á Fáskrúðsfirði. Hér halda líka allir með Manchester United í enska boltanum svo það er taumlaus gleði og ber vott um yfirburða þekkingu á knattspyrnu.

Er mikill fótboltaáhugi á Fáskrúðsfirði?
Það er mikill áhugi á knattspyrnu hérna, ætli að séu ekki um 80 af 100 krökkum í skólanum sem eru að æfa á vegum félagsins. Old boys spila innanhúsknattspyrnu líka af kappi hérna og eru t.d. 3 í viku yfir vetrartímann. Í Old boys er að finna eitt mesta efni sem komið hefur fram á Fáskrúðsfirði Ölver (möskva) Jakobsson, hann skoraði t.d. eina mark Leiknis á Pollamóti Þórs 2001.

Ertu sáttur við byrjun ykkar í sumar?
Nei, ég tel okkur eiga mikið inni. Við höfum byrjað þetta mót mjög illa og leiðinn getur bara legið uppá við. Ég held að ástæðan fyrir svona slæmri byrjun sé sú að meginþorri leikmanna okkar var að klára skólann um miðjan maí og nú þurfa þeir að vakna fyrir kl.8:00 og álagið hefur komið niður á þeirra frammistöðu. Þetta á sérstaklega við um vallarstarfsmennina okkar þá Hilmar, Björgvin og Jóhann Atla., sem unnu það ótrúlega afrek að taka 3. daga í að slá völlinn.

Er liðið mikið breytt frá því í fyrra?
Það eru talsverðar breytingar, mikið af ungum strákum eru að stíga sín fyrstu skref í meistaraflokki. Við höfum t.d. verið með 4.stráka úr 3.fl og 3 úr 2.fl. í liðinu en það ánægjulega er að þetta eru strákar sem eru aldir upp hjá félaginu. Helsta breytingin er nú samt sú að við lánuðum Marinó yfir til Fjarðabyggðar og við það losuðum við okkur við verst klædda leikmann Evrópu. Þannig að liðið lítur mun betur út núna.

Hver er helsti styrkleiki ykkar?
Okkar helsti styrkleiki er að meginkjarni leikmanna þekkist mjög vel og er héðan. Við höfum hæfileikaríka unga stráka sem eiga eftir að ná langt. Við erum í samstarfi við Fjarðabyggð um leikmenn og einnig heimavöllurinn okkar Búðagrund (Killing fields) sem hefur reynst okkur góður í gegnum árin og hafa fá lið farið með stig héðan. Við höfum lang fallegasta liðið á Íslandi, t.d. hafa Svanur og Daði neitað að skalla boltann í leikjum því þá gæti greiðslan hjá þeim eyðilagst,kannski það sé ástæðan fyrir því að við byrjum svona illa.

Hver eru markmið ykkar fyrir sumarið?
Markmið okkar eru einföld, við förum í alla leiki til að vinna þá. Við sjáum svo til hvað það skilar okkur í lokin. Þegar við Viðar tókum við liðinu í vetur gerðum við 2. ára samning með það í huga að byggja upp lið sem væri nógu öflugt til að gera atlögu að sæti í 2.deild. Einnig ætlum við að koma Jóhanni Erni og Hafliða út, en það er kannski erfiðara heldur en að vinna deildina.

Þú ert kominn með 184 mörk á Íslandsmótinu. Ætlar þú að reyna að feta í fótspor Valdimars Sigurðssonar og fara í 200 mörk?
Ég ætla að skrölta áfram svo lengi sem þörf er fyrir mig. Vonandi næ ég að brjóta 200 marka múrinn.

Hvaða lið telur þú að sé sigurstranglegast í 3.deildinni í sumar?
Ég tel að Völsungur, Dalvík/Reynir, Álftanes og Skallagrímur séu sigurstranglegustu liðin.

Eitthvað að lokum?
Ég vona að Fáskrúðsfirðingar verði duglegir að koma á völlinn í sumar. Svo verð ég að lýsa ánægju minni á því að uppeldisfélagið mitt Hrafnkell Freysgoði er að taka þátt í utandeildarkeppninni hér fyrir austan, tel að það verði formsatriði fyrir þá að vinna þá keppni. Þið vitið símanúmerið hjá mér og svo veit ég að Binni bumba á Seyðisfirði er til í að spila.

Eldra úr liðnum "Hvað er að frétta?"

1.deild:
Fjarðabyggð (10.júní)
ÍR (29.maí)
KA (15.maí)
Leiknir R. (29.maí)
Víkingur Ólafsvík (26.mars)
Þór (15.maí)

2.deild:
BÍ/Bolungarvík (29.apríl)
Hamar (21.apríl)
ÍH/HV (17.apríl)
Reynir Sandgerði (3.apríl)
Víðir Garði (21.maí)

3.deild:
Árborg (14.maí)
Berserkir (1.maí)
Draupnir (25.mars)
Einherji (16.apríl)
Huginn (29.maí)
KB (11.júní)
KFG (10.júní)
KFK (20.maí)
KFR (31.mars)
KFS (30.apríl)
Léttir (8.maí)
Skallagrímur (11.júní)