Pablo Punyed kom til Víkinga frá KR fyrir tímabilið og varð hann Íslandsmeistari með þriðja liðinu á Íslandi í síðasta mánuði; Stjörnunni, KR og síðast Víkingi. Pablo var lykilmaður hjá Víkingum í sumar.

Hann og Víkingar setja stefnuna hátt fyrir næsta sumar. Þeir ætla að vera fyrsta íslenska karlaliðið sem kemst í riðlakeppni í Evrópukeppni.

„Við ætlum að stefna á Evrópu. Við viljum vera fyrsta liðið sem kemst í riðlakeppni. Vonandi getum við náð því. Við erum með grunninn fyrir það og hópinn fyrir það," sagði Pablo.

„Við ætlum líka að berjast um báða titlana aftur."

Kvennalið Breiðabliks varð fyrir nokkrum vikum síðan fyrsta íslenska liðið til að komast í riðlakeppni. Þær eru núna í riðlakeppni Meistaradeildarinnar.