Haraldur Freyr Guðmundsson.
„Gífurlega erfiðar aðstæður og erfiður völlur að koma á, bara gríðarlega ánægður með sigurinn, þrjú stig og náum að tengja saman sigra sem er jákvætt. Mótið er hálfnað og nóg eftir, áfram gakk.“ sagði Haraldur Freyr Guðmundsson, þjálfari Keflavíkur, eftir 4-1 sigur á Grindavík í Grindavík í kvöld.
Lestu um leikinn: Grindavík 1 - 4 Keflavík
Það var sterkt fyrir Keflavík að koma til baka eftir að hafa lent undir en Halli var ánægður með það.
„Þegar þeir komast fannst mér það algjörlega gegn gangi leiksins, við vorum búnir að vera ofan á. Við töluðum um það að halda áfram. Mér fannst við svara þessu vel, við höldum ró okkar, fáum fullt af góðum stöðum til að krossa og skjóta á markið. Við erum með 2-1 stöðu í seinni hálfleik með vindinn í bakið og klárum leikinn vel.“
Halla fannst Keflavíkurliðið vera betri aðilinn allan leikinn.
„Mér fannst við betri í fyrri og seinni hálfleik hvort sem það er með eða á móti vindi en það getur verið trikkí líka að spila með svona mikinn vind sérstaklega á móti þeim sem liggja mikið niðri og beita skyndisóknum þeir náðu því tvisvar þrisvar en heilt yfir fannst mér við vera með þennan leik frá A til Ö.“
Keflavíkurliðið hefur verið mikið gagnrýnt í seinustu leikjum en þeir hafa nú náð að tengja saman tvo sigra og skora 7 mörk í þeim leikjum gegn Selfoss og Grindavík.
„Það gefur okkur helling að vinna leiki. Það er stórmunur á því að vinna og tapa. Sigurinn nærir. Það eru komnir tveir í röð núna. Við eigum Þrótt úti núna á föstudaginn og við ætlum að sjá hvort við getum unnið þrjá leiki í röð.“
Næsti leikur er gífurlega stór hjá Keflavík þegar þeir fara í Laugardalinn og mæta Þrótti R. í stórleik og geta hefnt sín eftir seinasta leik gegn Þrótti R.
„Ég er svosem ekkert í þessu til að hefna fyrir eitt né neitt. Allir leikir eru mikilvægir og mótið er rétt hálfnað og það er nóg af stigum í pottinum. Við verðum að einbeita okkur að næsta leik og taka stöðuna eftir það.“
Viðtalið við Harald má finna í spilaranum í heild sinni hér að ofan
Athugasemdir
