Ljóst er að U19 ára landsliði Íslands nægir sigur gegn Ungverjalandi á þriðjudaginn til að tryggja sér þátttöku á lokamóti EM í fyrsta sinn í sögunni.
Þetta er ljóst eftir jafnteflisleik Tyrkja og Ungverja sem lauk rétt í þessu og gerir út um vonir Tyrkja að ná í meira en 5 stig úr milliriðlinum.
Ísland vann óvæntan sigur á heimamönnum á Englandi fyrr í dag og er því á toppi riðilsins með fjögur stig, eftir jafntefli við Tyrkland í fyrstu umferð.
England er í öðru sæti með þrjú stig og þarf helst sigur gegn Tyrkjum í lokaumferðinni til að eiga möguleika á að komast á lokamótið.
Tyrkland U19 1 - 1 Ungverjaland U19
0-1 G. Jurek ('73)
1-1 E. Demir ('85)
Riðill 7:
1. Ísland - 4 stig
2. England - 3 stig
3. Tyrkland - 2 stig
4. Ungverjaland - 1 stig
Noregur og Portúgal eru búin að tryggja sér farmiða á lokamótið en Ítalía, Spánn, Grikkland og Pólland verma toppsæti sinna riðla ásamt Íslandi.
Mótið sjálft fer fram á Möltu dagana 3.-16. júlí og fær U19 landslið Möltu því sjálfkrafa þátttökurétt.