Birkir Már á æfingu í Annecy í morgun.
Bakvörðurinn Birkir Már Sævarsson fékk góðan svefn í nótt eftir ferðalagið til Annecy í gær. Hann segist kannski hafa sofið fulllengi en er mjög sáttur við allar aðstæður.
„Þetta er glæsilegt í alla staði, það er ekki hægt að kvarta yfir neinu," segir Birkir Már.
Það má búast við því að varnarmennirnir muni hafa í nægu að snúast í fyrsta leik gegn Portúgal.
„Það veltur mikið á okkur í þeim leik. Það verður allt liðið að hjálpast að eins og við gerðum í undankeppninni."
Birkir Már hefur engar áhyggjur af því að íslenska liðið muni ekki sýna sömu frammistöðu í lokakeppninni eins og það gerði í undankeppninni þó vináttulandsleikirnir hafi margir hverjir verið daprir.
„Æfingaleikir eru æfingaleikir og þar er verið að prófa leikmenn og ýmsa hluti. Þegar við erum komnir í alvöru leiki verður hausinn rétt skrúfaður á," segir Birkir Már en viðtalið má sjá í heild í sjónvarpinu hér að ofan.
