Versta byrjun Man Utd í 34 ár - „Þetta er ekki nógu gott“

Joachim Andersen gerði eina mark Crystal Palace eftir hann fékk boltann í teignum eftir aukaspyrnu Eberechi Eze og þrumaði honum upp í þaknetið.

Það gekk lítið fram á við hjá United sem var að tapa fjórða leik sínum á tímabilinu, en þetta er versta byrjun United í 34 ár.

„Markið þeirra, sem kom úr aukaspyrnu, er eitthvað sem við verðum að stjórna betur. Það er óþarfi að brjóta af sér þarna og síðan kemur boltinn inn í teig og varnarleikurinn ekki nógu góður.“

„Við tókum lélegar ákvarðanir á síðasta þriðjungnum. Við komumst svo oft í góðar stöður, bæði bakvið og fyrir framan öftustu línu Palace. Við vorum með þrjá leikmenn á því augnabliki, en náðum ekki að hafa næg áhrif til að komast að markinu, hvort sem það var aukasendingin, úrslitasendingin eða skotið.“

„Gæðin voru ekki nægilega góð á þessum hluta leiksins og við bara spiluðum ekki okkar besta leik síðasta hlutann,“ sagði Ten Hag enn fremur.