Það voru nokkur Íslendingalið sem mættu til leiks í dag. Í danska boltanum komu Ólafur Dan Hjaltason og Nóel Atli Arnórsson við sögu er Álaborg tók á móti Aarhus Fremad.
Ólafur Dan og Nóel Atli komu inn af bekknum í síðari hálfleik en gestirnir frá Árósum höfðu betur.
Eitt stig skilur að á milli liðanna í neðri hluta næstefstu deildar.
Breki Baldursson var ónotaður varamaður í naumum sigri Esbjerg gegn HB Köge. Esbjerg deilir toppsæti deildarinnar með Lyngby sem á leik til góða.
Þá var Ari Leifsson ekki í hóp í sigri Kolding á Hobro.
Í næstefstu deild í Hollandi fékk Helgi Fróði Ingason að spila seinni hálfleikinn í jafntefli hjá Helmond gegn Oss. Helmond er í neðri hluta deildarinnar.
Oliver Stefánsson var að lokum ónotaður varamaður í stóru tapi Tychy í næstefstu deild í Póllandi. Tychy er í botnsæti deildarinnar, sex stigum frá öruggu sæti.
Aalborg 0 - 1 Aarhus Fremad
Köge 0 - 1 Esbjerg
Kolding 2 - 1 Hobro
Helmond 1 - 1 Oss
Stal Mielec 4 - 0 Tychy
Athugasemdir
