Sallieu Tarawallie er 24 ára gamall landsliðsmaður frá Sierra Leone sem getur leikið bæði sem kantmaður og framherji. Tarawallie samdi við Víking Ó. í febrúar en þar sem pappírsmál drógust á langinn reyndist ekki hægt að kynna hann fyrr en nú. Hjá Víkingi Ó. mun hann hitta fyrir samlanda sinn, Ibrahim Sorie Barrie, sem nú er á sínu öðru ári hjá félginu.

Martin Kuittinen er á 22 aldursári en hann er finnskur kantmaður af pólskum ættum. Hann á að baki landsleiki fyrir yngri landslið Póllands og hefur undanfarin ár spilað í Portúgal. Martin var með Víkingsliðinu í æfingaferð á Spáni nýverið þar sem hann skoraði í æfingaleik gegn Cartagena B. Í kjölfar ferðarinnar var ákveðið að semja við hann.

Báðir eru þeir væntanlegir til landsins strax eftir páska

„Við bjóðum þessa tvo nýju leikmenn hjartanlega velkomna til Ólafsvíkur," segir í tilkynningu frá Víkingi Ólafsvík.

Liðið hafnaði í fjórða sæti í Inkasso-deildinni í fyrra en í gær fékk það óvæntan skell gegn Úlfunum sem leika í 4. deild.