Lokaumferðin í Svíþjóð fer fram á morgun en þar eiga Djurgarden, Malmö og Hammarby öll möguleika á að verða sænskur meistari.

Arnór Ingvi Traustason spilar með Malmö og Aron Jóhannsson með Hammarby en bæði þessi lið eru þremur stigum á eftir toppliði Djurgarden.

Malmö og Hammarby þurfa að treysta á að Guðmundur Þórarinsson og félagar í Norrköping vinni Djurgarden á morgun. Markatala allra liðanna er svipuð og ef Djurgarden tapar gæti spennan orðið ótrúleg.

Guðmundur Þórarinsson og félagar í Norrköping eiga möguleika á að hoppa upp fyrir AIK í 4. sætinu með hagstæðum úrslitum. Guðmundur birti í gær mynd á Instagram þar sem hann sagðist vonast eftir að enda tímabilið vel.

Arnór og Aron voru ekki lengi að setja ummæli við færsluna og óska eftir sigri Norrköping eins og sjá má hér að neðan.