Grealish var gríðarlega eftirsóttur á síðasta ári eftir að hafa gert góða hluti með Villa. Bæði Tottenham Hotspur og Manchester United voru á eftir honum og voru viðræður United við Villa komnar langt á veg.

Hann var afar nálægt því að ganga til liðs við United en á endanum hafi það ekki gengið upp. Grealish framlengdi samning sinn við Villa en ári síðar var hann keyptur til Manchester City fyrir 100 milljónir punda.

„Ég var mjög nálægt því að fara til Manchester United en á endanum varð ekkert úr því. Ég fór inn með hundinn minn og skrifaði svo undir nýjan samning við Villa," sagði Grealish.

„Við komumst að samkomulagi um klásúluna og ef eitthvað lið myndi bjóða þennan pening þá var þetta sigur fyrir alla því það þýddi að ég átti frábært tímabil og Villa myndi fá 100 milljónir punda."