Elín Metta á æfingu í dag.
„Æfingin var mjög skemmtileg. Við sóknarmennirnir fengum að skjóta mikið,” segir Elín Metta Jensen, sóknarmaður landsliðsins.
Hún ræddi við Fótbolta.net eftir æfingu liðsins í Fürth í Þýskalandi í dag, en þar er liðið í undirbúningi fyrir EM.
Hún ræddi við Fótbolta.net eftir æfingu liðsins í Fürth í Þýskalandi í dag, en þar er liðið í undirbúningi fyrir EM.
„Þessir dagar hafa verið frábærir. Við erum búnar að æfa við toppaðstæður. Við erum kannski enn að venjast hitanum hérna úti, en þetta er búið að vera ótrúlega gaman. Það er geggjað að vera í landsliðshópnum, þvílík gæði og gaman að vera í þessum tempói.”
Elín var allan tímann á bekknum í vináttulandsleiknum gegn Póllandi á dögunum. Var ekki svekkandi að fá ekki að koma inn á?
„Jú, en ég byrjaði að æfa svolítið seint eftir meiðslin um daginn. Maður tekur bara því hlutverki sem maður fær þegar maður er komin inn í þennan hóp. Það er þjálfarinn sem velur og ég skil það alveg.”
Er hún orðin alveg góð af þessum meiðslum? „Ég fékk hné í nára og það blæddi svolítið inn á vöðvana. Þess vegna var ég frekar stíf í langan tíma, en þetta er orðið gott núna og ég er tilbúin að hjálpa landsliðinu.”
Hægt er að sjá viðtalið í heild sinni í spilaranum hér að ofan. Þar ræðir Elín um tímabilið hjá Val og stórmótið sem er framundan.
