„Það er krefjandi að velja landsliðshóp og við höfum úr mörgum frábærum leikmönnum að velja úr og það eru virkilega góðir leikmenn sem eru utan hóps," sagði Jón Þór Hauksson í viðtali við Fótbolta.net.

„Það eru margir sem hafa verið að standa sig gríðarlega vel með okkur í þeim verkefnum sem af eru ári. Ég get nefnt Rakel Hönnudóttir og Sandra María Jessen dettur út frá því í verkefninu í Finnlandi, Guðbjörg Gunnars. er og verður ekki til taks hjá okkur á næstunni. Þetta eru allt reynslu miklir og frábærir leikmenn sem ég hefði gjarnan vilja hafa hér en þetta er það sem við höfum verið að stefna að, að spila marga leiki á þessu ári. Við höfum verið að undirbúa okkur fyrir þessa leiki og þetta er niðurstaðan úr því," sagði Jón Þór.

„Þetta eru tveir leikmenn sem hafa verið óheppnir með meiðsli að undanförnu og Sandra María hefur verið mjög óheppin á þessu ári varðandi okkar verkefni. Hún meiðist illa á hné og komst ekki með okkur á Algarve og síðan fékk hún slæmt höfuðhögg í lok deildarinnar í Þýskalandi. Þannig hún gat ekki spilað eins mikið fyrir okkur og við vildum í Finnlandi. Hún rétt kom inná í restina í seinni leiknum. Hún hefur verið óheppin," sagði Jón Þór og segir að sömu sögu má segja um Rakel Hönnudóttir.

„Hún glímdi við meiðsli undir lok tímabils í Englandi og missir af Finnlandsverkefninu með okkur þar. Nú er hún komin af stað og nær vonandi hörku undirbúningstímabili með sínu nýja liði, Reading. Hún byrjar vonandi ensku deildina af krafti og við fylgjumst grannt með henni þar. Hún hefur staðið sig frábærlega með okkur á þessu ári en samkeppnin er hörð og út í Finnlandi tókum við nokkra unga leikmenn sem höfðu verið í verkefni með U-19 ára landsliðinu og höfðu ekki verið með okkur áður. Þær stóðu sig frábærlega og þetta er það sem við teljum vera sterkasti hópurinn okkar núna."

Viðtali við Jón Þór Hauksson má sjá í heild sinni í sjónvarpinu hér að ofan.