Þórir Jóhann var á bekknum hjá Lecce í dag og fékk ekki mínútu en hann hefur ekki komið við sögu í síðustu fimm leikjum liðsins.

Þá hefur hann aðeins spilað rúmar tuttugu mínútur í síðustu níu leikjum. Lecce vann góðan 2-0 sigur á Sampdoria í dag og ekki hjálpaði það honum að fá mínútur.

Lorenzo Colombo skoraði undir lok fyrri hálfleiks og þá gerði Lameck Banda annað markið sjö mínútum fyrir leikslok. Lecce er í 15. sæti með 15 stig og hefur þá unnið síðustu tvo leiki. Sampdoria er í 19. sæti með 6 stig.

Bologna vann öruggan 3-0 sigur á Sassuolo. Michel Aebischer gerði eina mark fyrri hálfleiksins. John Lucumi átti fyrirgjöf frá vinstri inn í teiginn og náði Aebischer að stýra boltanum í fjærhornið.

Marko Arnautovic bætti við öðru á 50. mínútu. Leikmenn Bologna hreinsuðu boltann fram og var það Arnautovic sem skallaði hann niður á Roberto Soriano áður en hann undirbjó hlaupið. Soriano lagði hann inn fyrir á austurríska framherjann, sem tók eina snertingu framhjá markverðinum og lagði boltann í netið.

Skoski miðjumaðurinn Lewis Ferguson skoraði svo þriðja og síðasta markið tólf mínútum fyrir leikslok með stórglæsilegu skoti við vítateigslínuna og í hægra hornið.

Bologna er í 11. sæti með 19 stig en Sassuolo í 14. sæti með 16 stig.

Úrslit og markaskorarar:

Bologna 3 - 0 Sassuolo
1-0 Michel Aebischer ('30 )
2-0 Marko Arnautovic ('50 )
3-0 Lewis Ferguson ('78 )

Sampdoria 0 - 2 Lecce
0-1 Lorenzo Colombo ('45 )
0-2 Lameck Banda ('83 )