Markavélin Patrick Pedersen sleit hásin í úrslitaleik Mjólkurbikarsins í ágúst á síðasta ári. Hann fór í kjölfarið í aðgerð vegna meiðslanna og í desember fór hann í aðgerð á hinum fætinum, þeim vinstri, vegna meiðsla í hæl. Batinn á Patrick er hægur og stöðugur og vonast hann til þess að geta snúið aftur á völlinn fyrir lok maí.
„Þetta gengur hægt og rólega. Ég var í smá vandræðum með sárið eftir fyrri aðgerðina en þetta lítur fyrir að vera loksins að gróa núna," segir Patrick við Fótbolta.net.
„Ég fór í aðgerð vegna hælsins á vinstri fæti í desember og það hægir aðeins á batanum. En planið er að ég geti byrjað að hlaupa einhvern tímann í mars."
„Ég er að stefna á að vera mættur aftur á völlinn seint í maí, ég átta mig á því að það er kannski svolítil bjartsýni, en það er markmiðið. Það er erfitt að setja nákvæma dagsetningu á endurkomu en vonandi verð ég orðinn alveg heill í júní eða júlí," segir danski framherjinn.
Þrátt fyrir að hafa misst af lokaleikjunum í fyrra endaði Patrick sem markakóngur Bestu deildarinnar. Hann skorað átján mörk í nítján deildarleikjum og varð á síðasta tímabili markahæsti leikmaður í sögu efstu deildar.
Athugasemdir
