„Ég er yfir mig hamingjusamur með sigurinn. Mjög ánægður með að halda hreinu og skora 2 mörk. " sagði Halldór Jón Sigurðsson, Donni, þjálfari Þór/KA eftir 2-0 sigur á Haukum.
Lestu um leikinn: Þór/KA 2 - 0 Haukar
„Heilt yfir var frammistaðan ekki sérstök. Spilið gekk ekki nógu vel. Þær voru virkilega þéttar Haukarnir og stóðu sig frábærlega. En stelpurnar kláruðu þetta og það er frábært."
Þór/KA áttu í töluverðum erfiðleikum með að brjóta botnlið Hauka á bak aftur. Donni er þó ekki á því að topplið Þór/KA hafi vanmetið Haukana.
„Við undirbjuggum okkur vel og unnum leikinn 2-0. Vanmat og ekki vanmat, Haukar eru bara gríðarlega góðar og það þurfti þolinmæðisvinnu til að brjóta þær á bak aftur."
Þór/KA hefur unnið fyrstu fjóru leiki sína í deildinni. Donni segir að markmiðið sé að fara í alla leiki til að vinna þá en þær taki bara einn leik í einu.
Hér að ofan má sjá viðtalið í heild sinni.
