Spánn: Dovbyk skoraði þrennu er Girona niðurlægði Granada

Spútniklið La Liga-deildarinnar á Spáni, Girona, niðurlægði Granada í 7-0 sigri í lokaumferðinni í kvöld. Úkraínumaðurinn Artem Dovbyk skoraði þrennu og er aftur kominn á toppinn í baráttu um gullskó deildarinnar.

Giorina hefur spilað frábæran fótbolta undir Michael á þessari leiktíð.

Nokkrar vikur eru liðnar frá því Girona tryggði Meistaradeildarsæti en það hefur nú gulltryggt þriðja sæti deildarinnar með þessum stórsigri.

Úkraínumennirnir Dovbyk og Viktor Tsygankov léku á als oddi í leiknum en sá síðarnefndi skoraði tvö og lagði upp eitt á meðan Dovbyk skoraði þrennu og gaf eina stoðsendingu.

Alexander Sorloth var markahæstur fyrir lokaumferðina en þessi þrjú mörk frá Dovbyk hafa komið honum aftur á toppinn. Hann er nú með 24 mörk, einu marki meira en Sorloth.

Sorloth og félagar í Villarreal mæta Osasuna á morgun en hann þarf bara að skora eitt mark til þess að taka titilinn, þar sem hann hefur leikið færri deildarleiki en Dovbyk á tímabilinu.