Eiður Smári verður ekki áfram aðstoðarþjálfari íslenska karlalandsliðsins eftir að uppsagnarákvæði var nýtt í samningi hans en ástæðan ku vera áfengisneysla í síðasta landsliðsverkefni.

Vanda var með í umræddri ferð til Norður-Makedóníu en samkvæmt heimildum mbl.is var stjórnin klofin yfir þeirri ákvörðun að láta Eið fara. Vanda vildi halda Eiði áfram á meðan Arnar Þór Viðarsson, þjálfari landsliðsins, var á sama máli og stjórnin og taldi það réttast að láta hann fara.

Fjölmiðlar hafa ítrekað reynt að ná á Vöndu í dag en ekki hefur náðst í hana.

Hún var í vinnu í dag og birti meðal annars sendiherra Japans, Ryotaro Suzuki, mynd af sér með henni á Laugardalsvelli, en Einar Örn furðar sig á vinnubrögðum formannsins á Twitter en hann segir að hún hafi einnig neitað að tala við fjölmiðla fyrir ársþingið er hún var kosin formaður.

„Hmm.. Vanda var í vinnunni í dag en vildi bara ekki útskýra risastóra ákvörðun stjórnar KSÍ fyrir fjölmiðlum (og þar með fólkinu í landinu). Gerði sama fyrir ársþingið, neitað að tala við fjölmiðla. Þetta er ekki einkafyrirtæki heldur opinbert batterí, stærsta sérsambandið," sagði EInar.