Wan-Bissaka æfir aukalega til að hrífa Ten Hag

Hann er sagður ekki vera í áformum Erik ten Hag, nýráðins knattspyrnustjóra, fyrir tímabilið en ætlar að gera allt í sínu valdi til að láta stjórann skipta um skoðun.

Wan-Bissaka hefur því ákveðið að leggja mikið á sig á undirbúningstímabilinu til að hrífa stjórann og vinna sig aftur inn í byrjunarliðið. Hann er að mæta á aukaæfingar til að tryggja að vera í toppstandi líkamlega fyrir komandi átök og til að sýna Ten Hag hvað í sér býr.

Á síðustu leiktíð deildi Wan-Bissaka hægri bakvarðarstöðunni með Diogo Dalot og vill hann ekki missa Portúgalann framúr sér í goggunarröðinni.

Wan-Bissaka á tvö ár eftir af samningi sínum við Man Utd eftir að hafa verið keyptur sumarið 2019 fyrir um 50 milljónir punda. Hann hefur spilað 126 keppnisleiki með Rauðu djöflunum.