Spánn: Gavi og Raphinha sökktu Sevilla

Barcelona er á fleygiferð og er komið með átta stiga forystu á toppi spænsku deildarinnar eftir þægilegan sigur gegn Sevilla í kvöld.

Staðan var markalaus eftir fyrri hálfleik þar sem Börsungar voru við stjórn og héldu boltanum vel innan liðsins.

Flóðgáttirnar opnuðust í síðari hálfleik þegar Jordi Alba, Gavi og Raphinha komust allir á blað og áttu Alba og Raphinha einnig stoðsendingar.

Lokatölur sanngjarn 3-0 sigur þar sem Barca stefnir á Spánarmeistaratitilinn á meðan Sevilla er áfram í fallbaráttunni, en liðið hafði unnið þrjá af síðustu fjórum deildarleikjum sínum fyrir viðureign kvöldsins.

Barca hefur aftur á móti ekki tapað fótboltaleik síðan fyrir HM hlé. Í síðustu fimmtán leikjum hefur Barca gert eitt jafntefli og unnið fjórtán.