Championship: Umdeildur dómur í markalausu jafntefli

WBA og Burnley gerðu markalaust jafntefli í ensku B-deildinni í kvöld en umdeildur dómur kom í veg fyrir að gestirnir færu heim með öll stigin.

Burnley var líklegri aðilinn til að skora í leiknum. Jeremy Sarmiento átti hörkuskot sem Alex Palmer varði í fyrri hálfleiknum og þá var mark tekið af Jadon Anthony í þeim síðari.

Anthony stangaði boltann í netið en var dæmdur brotlegur fyrir að ýta Callum Styles. Í endursýningunni sást að Anthony kom varla við Styles í aðdragandanum.

WBA tókst aldrei að reyna á James Trafford í marki Burnley í annars áhugaverðu markalausu jafntefli.

Burnley er með 24 stig í 4. sæti en WBA, sem hefur ekki unnið í síðustu átta leikjum, er í 5. sæti með 22 stig.