Knattspyrnudeild Fram og danska félagið hafa komist að samkomulagi um vistaskipti Viktors Bjarka Daðasonar.

„Hinn 15 ára gamli Viktor Bjarki vann hug og hjörtu Framara með liði Fram í Bestu Deildinni seinni hluta sumars 2023 og hefur verið eftirsóttur af mörgum af stærri liðum Skandinavíu og víðar. Þetta undirstrikar það frábæra starf sem unnið er í yngri flokkum Fram," segir í tilkynningu Fram.

Viktor Bjarki fer til Kaupmannahafnar í sumar þegar hann verður 16 ára gamall.

„Hann er mjög spennandi sóknarmaður og er sterkur líkamlega, með mikinn hraða og góða tækni. Við sjáum mikla framtíð í honum," segir Mikkel Lund Køhler, yfirmaður leikmannamála hjá akademíu FCK.

FCK gekk á dögunum frá kaupum á Gunnari Orra Olsen sem kemur frá Stjörnunni. Það hefur gengið vel fyrir unga íslenska leikmenn að fara til Kaupmannahafnar á undanförnum árum og verður spennandi að sjá hvernig þessum efnilegu leikmönnum vegnar hjá félaginu.