Kólumbíski landsliðsmaðurinn kom aðeins til Barcelona frá Palmeiras í Brasilíu í janúar síðastliðnum, en spilaði lítið.

Clement Lenglet er líklega að koma frá Sevilla og Gerard Pique og Samuel Umtiti eru fyrir framan Mina í goggunarröðinni. Hann á því ekki von á mörgum mínútum ef hann verður áfram í Katalóníu.

Mina er aðeins 23 ára og spilaði með Kólumbíu á HM og var einn besti leikmaður liðsins þar. Hann gerði sér lítið fyrir og skoraði þrjú mörk á mótinu.

Nú virðist margt benda til þess að þessi hávaxni miðvörður sé að verða liðsfélagi Gylfa Sigurðssonar hjá Everton. Ef hann fer frá Barcelona í sumar munu Börsungar líklega sjá til þess að klásúla verði sett í samnings hans sem gerir Katalóníuliðinu kleift að kaupa hann aftur fyrir ákveðið verð.