Kei er aðeins 13 ára gamall en hann er fæddur á Fílabeinsströndinni og flutti ungur að árum til Bandaríkjanna. Hann er samningsbundinn Real Salt Lake, sem spilar í MLS-deildinni, en spilar með varaliði þeirra í USL-deildinni, Real Monarchs.

Hann var markahæstur í unglingamóti MLS-deildarinnar í sumar og spilaði þá sínar fyrstu mínútur með aðalliði Real Monarchs er það gerði markalaust jafntefli við Colorado Springs Switchbacks í gær.

Kei var 13 ára, átta mánaða og og níu daga gamall þegar hann braut metið og er því yngsti atvinnumaðurinn í liðsíþróttum í sögu Bandaríkjanna.

Framherjinn ungi er mikið efni og hefur verið boðaður á landsliðsæfingar með yngri landsliðum Bandaríkjanna en hann hefur þó ekki gert upp hug sinn hvort hann ætli sér að spila fyrir Bandaríkin eða Fílabeinsströndina.