Sveindís Jane Jónsdóttir lék allan leikinn úti á kantinum er Angel City FC gerði markalaust jafntefli á útivelli gegn Utah Royals í bandaríska kvennaboltanum.
Heimakonur í liði Utah voru hættulegri í leiknum en hvorugu liði tókst að skapa sér mikið af góðum færum.
Angel City er í neðri hluta deildarinnar með 17 stig eftir 16 umferðir, þó heilum tíu stigum fyrir ofan botnlið Utah. Sveindís og stöllur eiga enn góða möguleika á að næla sér í umspilssæti þrátt fyrir slakt gengi.
Hin norsk-íslenska Iris Ómarsdóttir var þá á sínum stað í byrjunarliði Stabæk í efstu deild í Noregi.
Hún átti tvær stoðsendingar í þægilegum fjögurra marka sigri á útivelli gegn Bodö/Glimt.
Stabæk siglir lygnan sjó um miðja deild með 23 stig eftir 17 umferðir. Iris er komin með fimm mörk og fimm stoðsendingar á deildartímabilinu en í fyrra skoraði hún 14 og lagði 6 upp.
Utah Royals 0 - 0 Angel City
Bodö/Glimt 0 - 4 Stabæk
Athugasemdir
