„Það var mikið í húfi og fyrri hálfleikurinn bar þessara merki," sagði Halldór Árnason þjálfari Breiðabliks eftir 2-1 tap gegn Zrinjski Mostar í kvöld.
Lestu um leikinn: Breiðablik 1 - 2 Zrinjski Mostar
„Þetta var gæðalítill fyrri hálfleikur hjá báðum liðum. Munurinn er þetta mark sem skoppar af hnénu á honum inn í marki. Ekkert vonlaus staða, þannig séð að fara inn í seinni hálfleikinn. Það var ákveðið högg að fá á sig sjálfsmark eftir einhverjar sekúndur í seinni hálfleik. Eftir það fannst mér við gera vel og koma okkur inn í leikinn. Við fengum svo sannarlega stöður og einhver færi til að jafna. Heilt yfir gerðum við ekki nóg, og þetta féll þeirra megin í dag klárlega. Þannig er bara stundum fótbolti. Við hefðum bara þurft að vera aðeins betri," sagði Halldór.
Breiðablik sótti um að leik þeirra gegn Val síðustu helgi yrði frestað en KSÍ neitaði þeirri beiðni.
„Það þýðir ekkert að vera pæla í því eða að tala um það. Liðin sem við spilum við fá alltaf viku á milli leikja, og við fáum það ekki. Við vissum það, það hefur alltaf verið þannig. Við bjuggum okkur undir það, og gerðum ekki ráð fyrir neinu öðru en að vera spila með tvo, þrjá daga milli leikja í nokkrar vikur. Þannig það þýðir ekkert að vera tala um það eftir á. Mér fannst við bara ágætlega ferskir, fyrri hálfleikurinn var hægur og ekki góður, en mér fannst við bara kraftmiklir í seinnihálfleik. Þannig að nei, ég get ekki verið að skrifa þetta á það," sagði Halldór.
Breiðablik fær annað hvort Virtus frá San Marino eða Milsami Orhei frá Moldavíu í næstu umferð í forkeppni Sambandsdeildarinnar. Þegar þessi frétt er skrifuð leiðir Virtus 4-3 í einvíginu.
„Moldóvska deildin hefur verið mjög sterk, Sheriff hefur unnið hana mörg ár í röð og náð frábærum árangri í Evrópu. Milsami er auðvitað ríkjandi meistarar, og góðir í deild. Ég held það séu allar líkur á að Moldóvarnir fari áfram og það verður bara hörku viðureign. Þeir eru í deild sem skilar mjög sterkum liðum inn í Evrópu, þannig það verður bara erfið viðureign eins og þessi. En svo sannarlega tækifæri til að vinna þá," sagði Halldór.
Viðtalið má sjá í heild sinni í spilaranum hér fyrir ofan.
