Cesc Fabregas og lærisveinar hans í Como töpuðu öðrum deildarleiknum í röð er það lá fyrir Sassuolo, 2-1, í Seríu A á Ítalíu í kvöld.

Como-menn komu sér í klaufalegar aðstæður á 42. mínútu leiksins er þeir áttu hornspyrnu sem var hreinsuð frá. Í kjölfarið keyrðu heimamenn upp í hraða skyndisókn. M'Bala Nzola átti ekki nógu fasta sendingu í gegn á Cristian Volpato sem náði þó til boltans og vippaði honum yfir markvörð Como og í netið.

Sassuolo tvöfaldaði forystuna tveimur mínútum síðar er NZola stakk sér inn fyrir vinstra megin og setti boltann af öryggi í markið. Fyrsta deildarmark hans á tímabilinu.

Áður en hálfleikurinn var úti minnkaði argentínski landsliðsmaðurinn Nico Paz muninn með lúmskum skalla úr teignum sem fór hátt upp í loftið og efst í vinstra hornið.

Líflína fyrir Como sem hélt meira og minna í boltann í þeim síðari, en náði að skapa sér fá færi. Paz komst næst því er hann lyfti boltanum yfir Stefano Turati í markinu, en markvörðurinn var fljótur að hlaupa til baka og bjargaði í tæka tíð.

Jöfnunarmarkið kom ekki og annað deildartap Como í röð staðreynd, en það hefur ekki gerst síðan í desember. Pressan farin að segja til sín hjá Como en liðið er 5. sæti með 58 stig, tveimur stigum frá Meistaradeildarsæti. Sassuolo er í 9. sæti með 45 stig.

Smelltu hér til að kaupa áskrift að Livey