Íslenska kvennalandsliðið tók þrjú stig gegn Úkraínu en landsliðsmarkvörðurinn Cecilía Rán Rúnarsdóttir segir að liðið hafi getað gert leikinn þægilegri fyrir sig. Nú er fókusinn hins vegar kominn á stórleik gegn Englandi á laugardaginn.
„Hefðum náttúrlega viljað skora fleiri mörk, gera leikinn kannski aðeins minna spennandi í lokin. Þetta var kannski óþarfa stress þarna síðustu mínúturnar. Það sem skiptir máli eru þrjú stigin og héldum hreinu sem er alltaf skemmtilegt.“
„Þær voru að keppa á Wembley þar sem er ótrúleg aðstaða. Það verður örugglega erfitt fyrir þær að koma hingað en við erum tilbúnar í allt.“
Fyrir leikinn gegn Englandi segir hún lykilatriði að halda skipulagi og nýta færi vel.
„Einfalt að segja að við verðum að halda markinu hreinu. Reyna að nýta föstu leikatriðin og löngu innköstin í að refsa þeim, skora.“
Hún bendir á að liðið hafi þegar sýnt að það geti skapað hættu.
„Við vorum nálægt því að skora á móti þeim síðast og vonandi kemur það bara á laugardaginn.“
Að hennar mati verður mikilvægt að halda betur í boltann.
„Það verður mikilvægt fyrir okkur að þegar við fáum boltann að halda í hann og ná að stjórna smá leiknum, svo við séum ekki hlaupandi endalaust.“
Að lokum leggur hún áherslu á mikilvægi stuðningsins.
„Það gefur okkur svo ótrúlega mikið. Það er alltaf talað um 12. manninn og það er bara rétt og gefur okkur ótrúlega mikið.“
„Þetta verður bara hörkuleikur þannig ég bara hvet fólk til að mæta."
