Tottenham er mögulega hætt við að selja framherjann Steven Bergwijn að sögn blaðamannsins Freek Janssen sem er hollenskur líkt og leikmaðurinn.
Fabrizio Romano greindi frá því fyrr í janúar að Tottenham væri reiðubúið að selja Bergwijn aftur til Ajax áður en glugginn myndi loka í febrúar.
Bergwijn átti magnaða innkomu í leik gegn Leicester City í vikunni og skoraði þá tvö mörk í uppbótartíma til að tryggja þrjú stig.
„Ajax hefur boðið nokkrum sinnum í leikmanninn en Tottenham hefur hafnað öllum boðunum," sagði Janssen í samtali við Voetbal Primeur.
Þessi frammistaða Bergwijn gæti hjálpað honum að halda sæti sínu í liði Tottenham en miklar líkur voru taldar á að hann væri á förum.
Það er þó spurning hvort Tottenham myndi samþykkja tilboð frá hollenska félaginu ef upphæðin hækkar með hverjum degi enda stutt í að glugginn loki.
Athugasemdir
