Ólafur Ingi Skúlason leikmaður Fylkis
„Ég er frekar svekktur með úrslitin. Hefði viljað taka þrjú stig svona útfrá því hvernig leikurinn spilaðist. Mér fannst við betri aðilinn á löngum köflum. Byrjum mjög vel og komumst í nokkur góð færi en náum ekki að klára þau. Svo missum við leikinn aðeins úr höndunum og þeir taka yfir enda eru þeir bara með mjög gott lið. “Sagði Ólafur Ingi Skúlason leikmaður Fylkis um leikinn eftir 1-1 jafntefli Fylkis við Stjörnuna í Árbæ í kvöld.
Lestu um leikinn: Fylkir 1 - 1 Stjarnan
Fyrri leikur liðanna sem fram fór fyrr í sumar var eftirminnilegur fyrir margar sakir. Ragnar Bragi Sveinsson kinnbeinsbrotnaði og Ólafur Ingi fékk rautt spjald í leik sem Stjarnan vann með marki á lokaandartökum leiksins. Var sá leikur ofarlega í huga Fylkismanna í undirbúningi fyrir leik kvöldsins?
„Nei nei þetta er annar leikur og bara einn leikur í mótinu. Það er svo langt síðan. Við erum búnir að fara í hlé á milli og Covid og þetta er búið að vera stopp start hjá okkur. En við hugsum bara um einn leik í einu og okkur langaði bara að vinna Stjörnuna. Það hefur ekki gerst í háa herrans tíð svo við erum svekktir með það en tökum stigið.“
Ólafur Ingi var farinn að finna vel til þreytu undir lok leiks og þurfti meðal annars á aðhlynningu vegna krampa að halda. Var þetta farið að taka vel í í lokin?
„Já ég er búinn að eiga erfitt tímabil. Búinn að vera mikið meiddur og búinn að vera með aftan í lærinu frá því í byrjun tímabils og er bara að komast af stað en það tekur bara smá tíma. Gott að fá 90 mínútur og klára en maður er svo sem ekkert að yngjast .“
Sagði Ólafur Ingi en viðtalið má sjá hér að ofan.
